DAVAO CITY – Karong adlawa na ang pinal nga deadline alang sa pagparehistro alang sa May 2022 National and Local Elections. Lauman na sa mga muapas karong adlawa ang taas nga pila sa usa ka dakong mall sa Ecoland ning Dakbayan alang sa 1st District ug sa buhatan mismo sa COMELEC-Davao sa Magsaysay Park alang sa 2nd ug 3rd Districts.
Bisan pa man sa makapilang higayon nga pag-abiso sa buhatan nga dili na paabuton ang deadline sa gipalugwayang pagparehistro, daghan gihapon ang midagsang sa mga ulahing adlaw sa voter registration.
Gibarugan usab sa buhatan nga ang October 30 deadline ang ulahing extension nga ilang ihatag sanglit okupado na ang ilang schedules sa mga musunod nga bulan.
Nakatakdang salaon sa COMELEC-Davao ang mga kandidato alang sa mga lokal nga katungdanan.
Magpaabot usab sila sa mga buot mag-withdraw o di kaha mag-substitute hangtod Nobyembre 15.
Gilaraw nga sa Disyembre pa mapagula ang pinal na listahan sa mga kandidato sa local elections sa Dakbayan sa Davao.
