DAVAO CITY- Nag-anunsyo ang Davao City Water District (DCWD) sa posibleng pagsaka sa singil sa tubig sugod ning bulan sa Hulyo ug mabayran kini sa mga konsyumante alang sa bulang Agusto nga billing.
Sa gipaguwa nga pamahayag sa ahensya, gamiton ang maong pondo sa 10-year development plan alang sa tumong nga mamahimong sustainable ang water service sa atong dakbayan uban ang paghatag og maayong serbisyo sa katawhan pinaagi sa pasalig sa kalidad sa tubig.
Ang maong adjustment ang kabahin sa 60% nga water rate adjustments nga gihangyo sa DCWD kaniadtong 2021, diin gi-aprobahan sa Local Water Utilities Administration ug unang gipatuman ang 30% ug 20% nga pagsaka sa singil sa tubig kaniadong tuig 2023.
Samtang sa pikas bahin, gumikan sa mga naisnatiang pag-ulan sa dakbayan, nag-anunsyo ang buhatan sa hinay ngadto sa walay agas nga tubig alang sa mga giserbisyohan sa Davao City Bulk Water Supply Project sugod Hulyo 1, 4, 5, 6, ug 7, ning tuig kasamtangan.
Sa gipaguwa nga advisory kaniadtong Hunyo 30, giawhag sa maong buhatan ang mga konsyumante sa pagtipig og limpyo nga tubig gumikan sa mga pag-ulan.
Kini tungod namatikdan sa maong buhatan ang pagtaas sa turbidity level sa Tamugan River gumikan sa kusog nga mga pag-ulan.
Gihangyo sa maong buhatan ang pagsabot sa katawhan uban ang pagpaningkamot sa paghatod og maayong serbisyo alang sa mga konsyumante.
