DAVAO CITY – Gikumpirma sa Davao City Police Office nga walay natalang taas nga threat levels kon bahad sa mga opisyales sa barangay ug ingon man, lokal nga public servants sa dakbayan sa Davao.
Nunot kana sa kamanduan ni PNP Chief Gen. Rodolfo Azurin Jr. nga i-monitor ang threat levels sa mga tagsa-tagsa ka politiko alang sa nagkaduol nga Barangay ug Sangguniang Kabataan Elections karong tuiga.
Sumala pa ni DCPO Spokesperson Police Major Catherine Dela Rey, taliwala sa ilang kasamtangang estado sa kaluwasan, nagpahinumdom gihapon kanila ang kapulisan nga magpakitabang kon aduna ma’y madawat nga mga hulga aron mahatagan og mga personahe alang sa ilang seguridad.
Dugang pa sa opisyal, muagi sa tumang background investigation ug assessment gikan sa mga intelligence unit sa DCPO ang matag threat levels sa usa ka politiko.
Magdepende sa kabig-aton sa maong hulga kon pila ka personahe sa DCPO ang ilang mahatag.
Wala sab natalang mga election hotspots dinhi sa dakbayan, subay na sab sa pinakaulahing pagpaniid sa kapulisan.
via || Bombo LJF
