DAVAO CITY – Wala’y nakita nga kahiwi-an ang Davao City Police Office (DCPO) sa kamatayon sa duha ka mga drug suspek atol sa pagbalik sa war on drugs sukad sa milabay nga semana.
Pinasikad sa imbestigasyon sa kapolisan, tino nga gi-nuetralized sa kapolisan ang mga suspek gumikan kay misukol kini dihang dakpon na unta sa kapolisan.
Sumala pa kang DCPO spokesman PSI Maria Teresita Plaza Gaspan duna sila’y ginasunod nga mga sumbanan sa pagpahigayon ug anti-illegal drug operations.
Dugang pa ni Gaspan nga gipakusgan sab nila ang ilang case build-up batok sa ilang mga target. Gipasalig sa DCPO nga nag-amping na karon sa pagpanakop ang ilang mga personahe.
Subay kini sa gilusad sa DCPO nga refresher course mahitungod sa Police Operational Procedures ug kamandu-an ni police Director Gen. Ronald Dela Rosa.
Hugtanon hinoon nga gibarugan sa kapolisan nga kung mopakita ug pagsukol ang suspek ug mabutang sa kaduha-duha-an ang kahimtang sa kapolisan ila gayud nga patyon ang suspek.
Sa ihap sa DCPO kinse na ka mga drug operation ang napahigayon sa kapolisan sa dakbayan sukad niadtong Enero 12, diin dese otso ka mga suspek ang nangadakpan ug duha ang napatay.
