DAVAO CITY – Gilusad sa Davao City Police Office ang OFW Helpdesk sa tanang mga presinto sa dakbayan alang sa mga OFWs.
Gikanayon ni DCPO Spokesperson PMaj. Catherine Dela Rey nga mamahimo nang idangop sa tanang mga police stations sa Davao City ang mga kakulian sa mga kababayang nanginabuhi sa ubang nasud, ug kapulisan mismo ang makipagkoordinar sa Overseas Workers Welfare Administration kon OWWA alang sa pagtubag sa ilang mga suliran.
Sumala sa opisyal, dagkong bentahi kini sa mga Dabawenyo nga nahimuyo gawas sa mga OFW centers sa dakbayan, ug ilabi nang gipatuman sab kini sa mga kapulisan sa tibuok nasud.
Sa maong pakig-alayon, gilaumang mapadali ang paghatud sa mga serbisyo sa mga nahisgutang ahensya.
Dugang sab ni Dela Rey nga nagmuntar sab ug mga personahe ang OWWA lakip ang Philippine Overseas Employment Administration kon POEA aron mutubag sa mga isyu nga gidangop sa mga police stations.
Gawas sa OFW desks, adunay referral office ang dakbayan alang sa OFW Families’ Welfare and Crisis Center nga mamahimong maabot pinaagi sa numerong 0999 994 3577; ug sa email address nga ofwcenter.davaocity@gmail.com.
via || Bombo LJF
