DAVAO CITY – Subling mipahimangno ang Davao City Police Office (DCPO) ngadto sa publiko batok sa pag-post ug mga unverified information sa social media ilabi na karon nga nagpadayon ang krisis sa coronavirus disease (Covid-19) pandemic.
Tipik lamang kini human nga gikuhaan ug video sa usa ka netizen ang usa ka babaye sa Roxas Avenue ning dakbayan sa milabay nga adlaw ug nagkanayon nga kini sumala pa ang miikyas sa isolation facility sa Queensland. Kahinumduman nga mitala ug daghanang views ang video nga gi-post sa usa ka Franco Gonzalez nga usa ka fake news nga mihatud ug kahadlok sa mga tawo.
Sumala pa kang DCPO Director Police Colonel Kirby John Kraft, mamahimong mag-atubang ug kaso ang nahisgutan nga netizens kung mapamatud-an nga nagpakatag kini ug sayop nga impormasyon ilabi na kung mihatud kini ug pag-panic sa katawhan.
Una ng gitino ni Kraft, nga ang nahisgutan nga babaye adunay suliran sa panghuna-huna ug dili kini positibo sa covid-19.
Gilayon sab dayon nga gi-delete human nga nakadawat ug daghanang pagsaway.
Ilalom sa Bayanihan to Heal as One Act, ang mga magpakatag ug sayop nga impormasyon mamahimong mabilanggo sulod sa duruha ka semana o pamultahon ug P10,000 ngadto na sa P 1 ka milyon ka pesos.
Sa kasamtangan nagpadayon sab ang pagpangita sa otoridad sa miikyas nga pasyente nga posibleng mohatud ug kontaminasyon human nga nagpositibo kini sa virus.
