DAVAO CITY – Aron malikayan ang pagdasok sa mga tawo sulod sa mga supermarket ug mga malls karon panahon sa General Community Quarantine (GCQ), nakiglambigit karon ang Davao City Police Office (DCPO) sa nahisgutan nga mga establisyemento. Una ng gibutyag ni DCPO spokesperson Capt. Rosario Aguilar, nga gihinabi na sa mga police station ang management sa mga mall ug supermarket kini aron nga malimitahan ang ihap sa mga mall goers nga mosulod sa nahisgutan nga establisyemento.
Gitino ni Aguilar, tumong niini nga matuman pa gihapon ang social distancing sulod sa mga mall ug malikayan ang padayon nga pagsaka karon sa Coronoavirus Disease 2019 (Covid-19) sa dakbayan.
Gitambagan na sab ang mga kapulisan nga nadestino sa mga Mall nga kinahanglan ipatuman niini ang hugtanon nga entrance ug exit policy aron nga masiguro ang tukma nga ihap sa mga tawo nga anaa sa sulod kini aron masiguro nga motuman ang mga nahisgutan sa social distancing.
Kalakip sab sumala pa sa mga magbantay ang mga sakop sa Tourist Police.
Hinuon gitambagan pa gihapon sa kapulisan ang publiko nga mas maayong dili na lamang mogawas ug magpabilin lamang sa panimalay kung dili kini importante kini aron masiguro nga pabilin nga luwas batok sa makamatay nga virus.
