DAVAO CITY – Gibutyag sa Davao City Police Office (DCPO) nga pipila na ka indibidwal ang nadakpan gumikan sa pagsupak sa wala pagsul-ob og face mask atol sa pagronda niini sa dakbayan sa dabaw.
Base sa datus nga gipagula sa DCPO, gikan bulan sa Marso hangtod Desyembre mikabat na sa 1,183 ka mga indibidwal ang mga nasikop gumikan sa wala pag sul-ob og face mask kung diin usa kini nga gipatuman nga lakang sa kagamhanan aron malikayan ang pagkuyanap sa makamatay nga virus.
Sumala sa pamahayag sa tigpamaba sa DCPO nga si P/ Capt. Rose Aguilar nga gumikan sa pagtaas sa nahisgutan nga ihap, mitabang na sab ang mga opisyales sa barangay sama na lamang sa pagbantay sailang mga residente ug kung maaktuhan kini nga nisupak sa maong mando, hatagan gilayon kini og citation ticket aron makmatngon sa sayop nga binuhatan.
Dugang niya nga adunay adlaw nga daghan ang madakpan apan aduna say adlaw nga mukunhod ang ihap.
Hinuon, nagpahigayon sab ang mga opisyales og pagpangahatag og libre nga face mask sailang mga residente aron malikay nga mataptan sa makamatay nga virus.
