DAVAO CITY – Subling nagpahinumdom ang kapulisan ngadto sa mga ginikanan nga ilang giyahan og bantayan sakto ang ilang mga anak aron dili malambigit sa bisan unsang daotan ilegal nga binuhatan. Kini matud sa tigpamaba sa Davao city police office (DCPO) nga si PMaj. Catherine Dela Rey.
Una niana, adunay natala nga riot niadtong nakalabay nga adlaw nga gikalambigitan sa, mga batan-on sa Awhag Village, Bacaca, Barangay 19-B, Davao City. Sumala sa opisyal nagpadayon ilang monitoring sa mga nagkadaiyang barangay sa dakbayan aron malikayan ang susamang panghitabo. Gimanduan sab ang mga Barangay officials nga manguna sa pag lantaw sa ilang dapit nga kun ugaling adunay kadudahan nga lihok ang kabatan-unan gilayong buwagon dayon kini aron di na mudako ang kagubot.
Gipunting sab ni Dela Rey nga inig musawop na ang adlaw, dili na pagawson sa ginikanan ang ilang mga anak labi na mga menor de edad. Sanglit padayon gihapon gipatuman ang curfew sa dakbayan.
Sa pikas bahin, gibutyag sa opisyal nga wala pay balaod karon nga nagmando sa otoridad nga panubagon ang ginikanan sa mga menor de edad nga madakpan.
Sa karon nagpabilin sab nga gidaghanon sa ihap sa mga marescue sa kapulisan. Walay pagsaka wala say pag-ubos.
