DAVAO CITY – Gipakita sa bag-o lang nga pagtuon sa Mindanao Development Authority (MinDA) nga kadaghanan sa mga Dabawenyo nagtuo nga nagpabiling luwas ang Davao City ug nagpabiling lig-on ang pagsalig sa mga kapulisan sa dakbayan.
Sa maong pagtuon nga gihimo niadtong Mayo 10-20, 2023, nihatag ang mga Dabawenyo og 84% nga rating alang sa gilantaw nga kaluwasan sa siyudad, 86% alang sa seguridad, 87% alang sa pagsalig sa pwersa sa kapulisan, ug 88% alang sa pagrespeto sa mga katungod, kinabuhi sa mga sibilyan, ug kabtangan.
Nakita sab sa pagtuon nga makapadungag sa kabalaka sa katawhan ang mga sensationalized criminal cases, apan nagpabilin nga nahimulag ang maong mga kaso ug wala magpakita sa pagtaas sa kinatibuk-ang rate sa krimen sa Davao City.
Nagpasalamat si Davao City Police Office spokesperson PMaj Hazel Tuazon sa pagsalig sa mga Dabawenyo ug gisiguro niini nga nagpadayon sa pagpatuman sa nagkalain-laing programa ug kampanya sa seguridad, lakip na ang anti-robbery ug theft operations pinaagi sa ‘Oplan RATS-Tugis’, community-based anti-sexual campaign nga ‘Oplan Kilos’, ug Oplan Kalinaw.
Nanawagan usab siya sa mga komunidad ug mga lider sa barangay nga magpadayon sa pagsuporta sa mga inisyatibo sa kalinaw ug kahusay sa DCPO.
Sa kinatibuk-an, nagpadayag ang pagtuon sa mga rating nga 86% alang sa kaluwasan, 85% alang sa seguridad, 88% alang sa pagsalig, ug 87% alang sa pagtahod sa mga katungod, kinabuhi, ug kabtangan sa Davao Region.
via || Bombo LJF
