DAVAO CITY – Gi-angkon sa Davao City Police Office (DCPO) nga kulang ang ilang mga personahe aron magbantay sa tibuok populasyon sa dakbayan.
Matud pa kang Police Senior Supt. Michael John Dubria ang Director sa Davao City Police Office (DCPO), nanginahanglan pa sila ug 1,431 ka mga PNP personnel samtang kung hisgutan sab ang mga armas, mikabat lamang sa 349 ang gi-isyu kanila o kulang pa ug 1,034.
Nasayran sab sa opisyal nga anaa sa 1,969 lamang ang uniformed personnel sa dakbayan o kulang kung bantayan ang 1.7 milyon nga populasyon sa siyudad.
Gikanayong sa matag usa ka PNP personnel, mobantay ug 863 ka tawo hinungdan nga wala sumala pa kini nahaom.
Apan luyo sa ilang kakulangon, gipasalig ni Dubria nga wala nagpasagad ang kapulisan sa ilang trabaho ilabi na ang pagtutok sa mga nagkadaiyang krimen nga nahitabo sa siyudad.
