DAVAO CITY – Nagpadayag sa iyang kabalaka ang hepe sa Davao City Police Office (DCPO) kalabot sa paghuot sa mga presohan hinungdan nga gi-awhag niini ang Bureau of Jail Management and Penology (BJMP) nga dawaton kadtong mga detainees nga adunay commitment order ug nakapasar sa rapid diagnostic test (RDT).
Sumala pa kang DCPO Director Kirby John Kraft, nga adunay kinatibuk-ang 448 ka mga peneriso ang anaa sa kustodiya sa kapulisan sa ilang 12 ka mga police stations usa sa ilang barracks.
Sukad Marso 20, gipatuman na sa kapulisan sa Davao ang lockdown sa tanan nila nga mga jail facilities.
Gisuspende una ang pagdawat ug bag-ong persons deprived of liberty (PDLs) sa ilang mga pasilidad isip kabahin sa ilang precautionary measures aron malikayan ang coronavirus disease (Covid-19) contamination.
Dili buot sa BJMP nga mokumpiyansa sanglit delikado ang ilang pasilidad sa virus.
Aron nga makunhuran ang paghuot sa mga pasilidad gumikan sa pagsaka sa mga quarantine violators, giduso na lamang nila ang kaso pinaagi sa regular filing procedure.
