Giklaro sa Davao City Police Office (DCPO) nga usa lamang ka fake news ang mikatag nga video sa giingong pagpangidnap nga nahitabo sumala pa sa Buhangin, niadtong nakalabayng adlaw.
Subli nga mikatag sa social media ang maong video diin makita nga adunay pipila ka mga babaye nga gipugos nga gisakay sa usa ka sakyanan samtang naglakaw kini sa dalan.
Sa maong video, makita usab nga adunay usa ka babaye nga nakasaksi sa nahitabo sa giingong pagpangidnap. Kini giila nga pag-umangkon matud pa sa higala sa nag-upload sa video nga si AC Cardona.
Matod pa niini, nga hangtod karon, gi-nerbyos pa ang maong nakasaksi sa insidente.
Sumala pa sab ni Police Captain Hazel Caballero-Tuazon, ang tigpamaba sa DCPO, nga tinuod nga gidala ang duha ka babaye nga naa sa video ug gipugos nga isakay sa sakyanan sa daplin sa dalan pasado alas 11:30 sa gabii niadtong Hulyo 4.
Bisan pa man niini, nasayran nga gibuhian ra sab sila gikan sa Buhangin paingon sa Toril.
Matod pa ni Police Major Clarian Dave Toboso, ang station commander sa Buhangin Police Station, nga wala na magpa-blotter ang mga biktima tungod sa ilang personal nga tinguha nga magpuyo na lamang sa hilom aron malikayan ang kasamok.
Gidugang pa sa opisyal nga dili na menor de edad ang mga biktima, ug sila mismo ang naghangyo nga respetohon ang ilahang desisyon.
Samtang gibutyag sab ni Tuazon nga mas maayong tangtangon na lamang ang maong video o dili na kini i-share sa social media gumikan magdala lamang kini og kahadlok sa publiko.
Gipasabot sab niini nga bisan pa sa pipila ka krimen nga natala, nagpabilin gihapon nga luwas ang siyudad sa Davao.
