DAVAO CITY – Nakatala karon ang Davao City Police Office (DCPO) og pagsaka sa kasong pagpangawat alang sa ikatulong quarter ning tuig kasamtangan.
Kini subay sa report nga gipagula ni PCol. Alberto Lupaz, Director sa DCPO, atol sa gipahigayong press conference kaganihang buntag.
Gikabutyag niini nga misaka sa halos 40 ang kaso sa theft o pagpangawat dinhi sa syudad sa Davao. Subay sa record, ang theft ang adunay pinakataas nga ihap sa kaso. Gisundan kini sa pagpanglugos ug ikatulo ang robbery.
Sa pikas bahin, gikanayon ni PBGEN Benjamin Silo Jr., Regional Director sa PRO XI, nga gikan Enero hangtud Setyembre 17 ning tuiga, nakatala og 1,006 ka mga insidente ang kinatibuk-an sa Davao region ug pinakadaghan niini ang gikan sa Davao City.
Dugang pa sa opisyal, adunay napasakang kaso sa rehiyon unse nga muabot sa 983 gikan sa 1,006 ka mga insidente o 97.71 percent. Nakakab-ot usab ang rehiyon og crime solution efficiency nga muabot sa 54.77 % o 551 ka mga suspek ang nangadakpan.
Muabot na lamang sab karon sa 2.29 percent ang mga unsolved cases o dili ba kaha under-investigation nga mga kaso sa Davao Region.
