Gipaklaro karon sa Davao City Police Office (DCPO) nga dili lamang mga pabuto kon firecrackers ang hingpit nga ginadili dinhi sa dakbayan, apan lakip na sab ang lantaka.
Ang lantaka maoy usa matud pa ka daw basoka og porma nga sinumpay gamit ang mga lata o uban pang matang sa panudlanan, diin ginapaboto kini gamit ang usa ka makahilong kemikal nga makadaot sa panglawas sa usa ka tawo.
Sumala pa ni PCapt. Hazel Tuazon, ang tigpamaba sa DCPO, nga hingpit kini nilang ginadili dinhi sa dakbayan, diin kung ugaling adunay makita ang mga otoridad nga susamang nagapabuto gamit ang lantaka, kinahanglan kini nilang kompiskahon, gumikan dako sumala pa kining posibilidad nga makadisgrasya kini ngadto sa laing tawo.
Dugang pa ni Tuazon nga sagad sa mga nagagamit niining maong matang sa pabuto, mga menor de edad, rason nga giawhag niini ang mga ginikanan nga ilahang badlungon ang ilahang mga anak aron ngad dili kini makadisgrasya nga mao pa kana ang makahatag og dakong problema.
