Gikompirma sa Davao City Police Office (DCPO), inubanan sa Police Regional 11, nga maghatag og PHP 100,000 isip reward money alang sa makahatag og impormasyon nga magdala sa pagkadakop sa lima ka nahibilin nga mga suspetsado nga nalambigit sa pawnshop robbery nga nahitabo atong milabayng adlaw, sa Ilustre St., ning dakbayan sa Davao.
Kahinumdoman, nga gikompirma ni PCapt Hazel Caballero-Tuazon, ang tigpamba sa DCPO, nga adunay unom ka mga suspetsado ang nalambigit sa maong tulis diin usa niini ang nadakpan sa susama nga adlaw.
Gibutyag usab sa opisyal nga mitug-an na ang usa ka nadakpan nga si Jonny Bulawan ug nakuha na sa kapolisan ang mga pangalan sa lain pang mga suspetsado apan, dili pa kini angay nga ipagawas sa publiko.
Gipaklaro usab sa opisyal nga kasamtangan pang nagapadayon ang imbestigasyon sa kapulisan ug adunay posibilidad nga dili lamang unom ka mga tawo ang nagpaluyo sa maong krimen.
Samtang, giawhag usab sa opisyal ang publiko nga magtinabangay aron mapabilin ang kalinaw ug kahapsay dinhi sa dakbayan, ingon man kung adunay mga impormasyon bahin sa mga nahibilin nga mga suspetsado dali kining itaho sa labing doul nga police station.
