Gipaklaro karon sa Davao City Police Office nga di matud pa tinuod ang post sa usa ka Mark Dimerin nga nagpailang usa ka ‘bishop’ gikan sa Zamboanga nga wa kini giatiman sa San Pedro Police Station samtang midangop kini aron nga magpablotter sa iyang gidangatan.
Kahinumdumang gisaway sa kapulisan ang nahimong post niini human nga gipakatag niining di na matud pa luwas ang dakbayan human nga gihuthutan matud pa kini og 3 ka mga binabaye samtang nagcheck-in kini sa usa ka hotel sa sa Palma Gil ning siyudad niadtong Oktobre 9 ning tuiga.
Saysay matud pa niini sa kapulisan nga gisipa ug gisumbag kini sa mga bayot.
Apan, human nga gisubay sa kapulisan ang CCTV sa maong buhatan, migawas nga namakak si Dimerin.
Nasuta nga ang 3 ka mga bayot ang misaka sa 2nd floor sa hotel ug nanuktok sa kwarto sa reklamante.
Gani, way pagpamwersa ang pagsulod sa usa sa bayot, apan human ang kapin duha ka 2 minuto, gilayon kining migawas ug mikanaog paingon sa lobby sa hotel sabay si Dimerin rason nga nakahukom ang kapulisan nga namakak kini sukwahi sa iyang saysay nga nanuktok ang mga bayot ug pugsanon kining nanulod.
Mipalag sab ang kapulisan human nga gipakatag niini pinaagi sa post nga di na matud pa luwas ang dakbayan.
Gani, gikumpirma sa tigapamaba sa Davao City Police Office,P/Capt. Hazel Tuazon nga gilayong giadtuan sa kapulisan ang naasyong hotel aron sutaon ang reklamo niini.
Samtang, subling nagpahimangno ang kapulisan nga di magpataka og pakatag og balita nga way basehan aron nga malikay nga makahatag og kaguol sa katawhan.
