Giklaro sa tigpamaba sa Davao City Police Office (DCPO) nga bisan paman sa alleged mental problems sa babayeng nisulod sa bike lane atol sa IRON MAN 70.3, dili gihapon kini exempted sa mga kaso nga angay niining paga-atubangon.
Sumala pa ni PCapt. Hazel Tuazon, tigpamaba sa DCPO, nga adunay saktong proseso nga pagahimoon ang kapulisan human nga mafile ang kaso uban sa tabang gikan sa pamilya sa dinakpan.
Kahinumduman nga nakaani og daghanang reaksyon sa social media ang gibuhat nga matud pa “pagpasikat” sa dinakpan na giilang si Kriszelle Ann Cabo human kini mipugos pagsulod sa bike lane sa Iron Man 70.3 diin dako kaayong risgo alang sa mga partispante.
Usa sab sa nakatampo sa kasuko sa katawhan mao ang pagmagahi niini bisan paan sa mga pagsita ug paghangyo s akapulisan nga mohunong sa pagmaneho.
Alayon niini, ginatun-an pa sa DCPO kung ipa-agi ba kini og drug test sanglit aduna usab kiniy proseso ginatuman hilabi pa nga dili ang paggamit og illegal nga droga ang hinungdan sa iyang pagdakop kondi ang kalapasan niini sa gipatumang balaod sa kalsada.
Una na usab gihagit ni Cabo ang mga kapulisan nga magpa drug-test dungan kaniya sa laraw nga madungog ang mga adbokasiya niini nga kagawasan.
Sa karon, kalakip sa mga kasong paga-atubangon sa dinakpan mao ang violation sa Article 151, RA 4136, RA 10054.
Hinoon, bisan paman niini, nagpaabot gihapon og pasalamat ang opisyal sa tanang security personnel nga nagbantay sa safety and security sa mga bisita. Gipahumduman sab niini ang publiko nga mosunod sa balaod nga ipatuman sa mga otoridad atol sa nagpadayong Kadayawan Festival.
