DAVAO CITY – Gibutyag ni Davao City Police Office (DCPO) director Colonel Albert Lupaz nga walay mastermind mahitungod sa Bragas-rape slay, apan, kung kahinomdoman, una nang gibutyag ni Lupaz nga naka-depende ang SITG sa pahayag sa usa ka bugtong witness, kinsa nikumpirma nga dunay tulo ka tawo lakip ang biktima nga nakasakay sa yellow nga ombak nga miagi matud pa kaniya.
Ning kasamtangan, gikumpirma ni Lupaz nga base sa pahayag gikan sa witness, aduna gayud matud pa nakasakay daan, nga usa ka batang-hamtong nga lalaki ug edaran nga driver sa maong yellow nga ombak, sa dihang gi-pick up niini ang biktima.
Kung kahinomdoman usab, nagpagawas ang otoridad og hulagway mahitungod sa ombak nga gisakyan sa biktima ug mao kini karon ang ginasubay sa mga otoridad.
Sa taho, usa ka kolor yellow nga ombak nga (RE TRIMOTORS) nga anaay CRC sticker sa left side nga tapalodo sa ligid nga bahin ug sticker nga bungo kon kalabera nga adunay pula nga luha ug sungay nga nakapilit ilawom sa rightside headlight nga bahin ug aduna say kwentas nga bangkil nga naka bitay sa atubangan sa ombak.
Mao kini usab ang giklaro ni Lupaz diin subay sa imbestigasyon sa Traffic Enforcement Unit, usa ka Reverse Engineering kon RE Badja, Rickshaw ang modelo sa bao-bao nga gigamit sa suspek sa pagpanglugos-patay sa 28-anyos nga babaye.
