Giawhag ni PCapt. Hazel Tuazon ang tigpamaba sa Davao City Police Office, ang mga ginikanan nga adunay mga bata nga ga laroy-laroy sa kadalanan nga mamahimo kining responsable sa ilahang tagsa-tagsa ka mga anak.
Subay kini sa usa ka panghitabo, diin na-rescue ang usa ka 6 anyos nga batang lalake nga misimhot og solvent kon Rugby sa Bolton St. ning dakbayan, diin ang mga kaubanan sab niini dali nga misibat, sa dihang nakita nila nga padulong na ang duha ka mga pulis ngadto sa ilahang gikahimutangan.
Gikanayon ni Tuazon nga dili sumala pa sa tanang higayon mabantayan sa kapulisan ang tibuok bahin sa dakbyan, rason nga giawhag niini ang tanang mga ginikanan nga makigkoopera, pinaagi sa paghipos sa ilahang mga tagsa-tagsa ka mga anak.
Gipaklaro sab niini nga dili pa angayang mabilanggo ang mga menor-de-edad, gumikan dila pa susama sila og panghuna-huna sa usa ka hamtong na nga indibidwal.
Ugaling adunay ma rescue nga mga menor de edad, nga nagabuhat og mga dili maayong butang, ilaha lamang kining dalahon ngadto sa kostudiya sa DSWD aron nga mahatagan og intrebensyon, diin magiyahan kini sa mga angayang buhaton.
