DAVAO CITY – Gibutyag sa Davao City Police Office (DCPO) nga andam na ang ilang ipatuman nga security measures sa Davao region alang sa nagsingabot nga eleksiyon sa bulan sa Mayo ning tuig kasamtangan.
Sumala pa kang Police Senior Inspector Maria Theresita Gaspan, tigpamaba sa DCPO, nangandam na sab karon ang 12 ka mga istasyon sa kapulisan dinhi sa siyudad aron nga masiguro nga hapsay nga mapahigayon ang eleksiyon ug mapugngan kadtong adunay dautan nga mga plano.
Gani gipahimangnoan na sab sumala pa kadtong mga police station diin adunay mga lugar nga kalakip sa election watchlist areas (EWAS) nga kanunay magbinantayon.
Gitataw sab ni PSI Gaspan nga doble ang ilang i-deploy nga kapulisan sa mga lugar nga sakop sa EWAS aron nga masiguro ang kahusay ug kalinaw ug mas pahugtan pa nila ang ilang monitoring sa nahisgutan nga mga lugar ayha ang ipahigayon nga eleksiyon.
