Andam na ang kapolisan sa Davao City Police Office kon DCPO aron ipatuman ang hugot nga mga lakang sa seguridad alang sa umaabot nga selebrasyon sa Chinese New Year karong Enero 29, 2025.
Sumala pa ni Police Captain Hazel Tuazon, ang tigpamaba sa DCPO, kapin 200 ka mga personahe ang ipakatap aron magbantay sa kaluwasan ug kahusay sa publiko atol sa aktibidad.
Ang mga kapolisan nga itudlo niini magatiman sa pagmentinar sa kahapsay ug motubag sa bisan unsang insidente nga mahimong mahitabo sa panahon sa selebrasyon.
Gipasiugda usab ni Tuazon nga nakig-koordinar na ang DCPO sa Chinese community sa Davao City aron magtinabangay sa pagplano ug pag-organisar sa seguridad sa mga kalihokan nga ipahigayon sa panahon sa Chinese New Year.
Ang tumong sa kooperasyon aron masiguro ang usa ka hapsay ug luwas nga selebrasyon alang sa tanan nga musalmot.
Nagpahimangno usab si Tuazon ngadto sa Dabawenyo nga sundon kanunay ang mga regulasyon ug mga patakaran, o ang “Do’s and Don’ts,” nga ipatuman atol sa selebrasyon.
Gumikan, ang mga giya nga gidesinyo alang usab nga masiguro ang kaluwasan sa publiko ug malikayan ang bisan unsang kasamok o aksidente sa tibuok kalihokan.
Ang pagpaningkamot sumala pa sa DCPO nagapakita sa ilang dedikasyon sa pagpanalipod sa kahusay ug kalinaw, aron matagaan ang mga lokal ug bisita og usa ka luwas nga pagselebrar sa Chinese New Year.
