Gibutyag sa Davao City Police Office (DCPO) nga andam ang buhatan niini kun ugaling dunay mahitabo nga kakulian o mga rally sa dakbayan karong umalabot nga State of the Nation Address (SONA) ni Pangulong Ferdinand Marcos Jr.
Sumala ni PCpt. Hazel Caballero-Tuazon, tigpamaba sa DCPO, kanunay nga anaa ang kapulisan aron nga paniguruhon ang kahan-ay ug seguridad sa mga musalmot sa maong rally kun ugaling man dunay ipahigayon nga susamang aktibidad.
Samtang, gitin-aw usab ni Tuazon nga wala kini mga bahad nga nadawat sa ilahang obserbasyon karon kabahin sa posibleng mga kakulian sa umalabot nga SONA.
Nasayran nga ipahigayon ang maong SONA karong Hulyo 28 ning kasamtangang tuig alang nga maghatag og impormasyon kalabot sa kasamtangang sitwasyon sa nasud, mga nabuhat sa administrasyon lakip na usab ang mga laraw ug proyekto niini hangtod sa mahuman ang kasamtangang termino.
Kahibaloan nga kasagarang rally usab mao ang ginapahigayon sa Freedom Park ning dakbayan sa Davao diin dili na magkinahanglan pa og permit.
Apan kun ugaling ipahimutang ang maong mga kalihukan gawas sa nahisgutan nga parke mamahimong mukuha usa og permit sa lokal nga panggamhanan alang usab nga masiguro sa kapulisan ang kahapsay sa rally.
Samtang sa laing bahin, ang pagpahigayon og rally wala usab nga ginatan-aw isip negatibo nga butang sa maong buhatan ingon man nga usa usab kini sa mga pamaagi aron nga mapadangat sa mga katawhan ang mulo niini.
Apan ginbug-aton usab ni Tuazon nga kinahanglang pagabuhaton kini nga limpyo ug uyon sa insaktong proseso.
Hinuon, base usab sa obserbasyon sa opisyal sa mga rally nga gibuhat kaniadtong mga nakalabyng mga bulan o sa pila na ka mga higayon, gikataho niining wala kini miresulta sa bisan unsang kagubot.
Hinungdan nga kompyansa karon ang DCPO nga magpabiling malinawon ang SONA diin gibarugan sa maong buhatan nga andam kini permanente sa pagsiguro sa kahapsay sa palibot ug siguridad sa publiko.
