DAVAO CITY – Pipila ka semana ayha ang paghinumdom sa semana Santa, nagpatuman na ang Davao City Overland Transport Terminal (DCOTT) ug mas istrikto nga security measures ilabi na nga ilang gilaoman ang pagdagsa sa daghanang pasahero nga pasulod ug pagawas sa dakbayan.
Sumala pa kang DCOTT head Aisa Usop nga ang terminal management ug security forces sama sa Task Force Davao (TFD) ug uban pang security personnel magpatuman ug hugtanon nga seguridad ngadto sa mga pasahero sa panahon sa Lenten week.
Sa kasamtangan gisapinal pa sa DCOTT ang ihap sa mga bus nga i-deploy ilabi na nga anaa na sa 650 ngadto na sa 750 buses ang ginapakatag matag regular day.
Dugang ni Usop nga ang mga vendors ug stall owners sulod sa terminal ang na-orient na kung hisgutan ang security measures, ilabi na kung aduna silay mamatikdan nga mga katahapan nga tawo nga posibleng mohimo ug bahad. Nanawagan sab ang DCOTT head sa tanan nga mga pasahero nga mag-adjust sa gipatuman nga security measures gumikan kay alang lamang kini sa ilang kaayohan. Kinahanglan sab sumala pa nga idili ang pagdala ug mga ginadili nga butang sama sa kutsilyo, sundang ug daghanan pa.
