DAVAO CITY – Gipahigayon sa City Explosive Ordinance Disposal and K-9 Unit ang usa ka seminar alang sa mga personahe ug stakeholders sa Davao City Overland Transport Terminal (DCOTT) diin tumong niini nga mas mapakusgan pa ang culture of security sa maong terminal.
Gipangunahan sa Davao City Police Office (DCPO) ang pagpahigayon sa Project ABKD o Awareness of Bombs that Kill lives and destroy properties sa ecoland terminal.
Sa maong seminar, gipakita ug gipa-ila-ila sa mga pasahero ang itsura sa klase-klaseng explosive devices nga sagad ginagamit sa pagpamomba.
Tumong niini aron mahatagan og giya ug kahibalo ang mga pasahero sa higayon nga makakita sila og susama niini nga butang nga ibilin sa palibot.
Sumala pa ni Aisa Usop, manager sa DCOTT, nga mahinungdanon matud pa alang sa mga porters, peddlers, CSU, mga staff ug mga sweepers sa terminal nga ma-aware sila.
Dugang pa niini nga daghan kaayo ang mga pasahero nga nagasulod sa DCOTT diin gibana-banaang anaa kini sa minimum nga 35,000 ka mga pasahero matag adlaw.
