DAVAO CITY – Gikumpirma ni Aisa Usop, manager sa Davao City Overland Transport Terminal (DCOTT) nga dili hugot ang mga rekisitos sa higayon nga mubiyahe ang mga pasahero apan mas gipahugtan nila karun ang ipatuman nga seguridad ilabi na nga lauman ang pagdagsa sa mga pasahero nga mopauli sa ilang mga probinsiya karung nagsingabot nga Semana Santa.
Gikanayon sab sa opisyal nga nakiglambigit na sila karon sa uban pang hingtungdan nga ahensiya sa kagamhanan sama sa LTO ug LTFRB arun lamang masiguro nga kompleto ug rekisitos o mga dokumento ang mga nagabiyahe nga bus sulod sa terminal.
Dugang gibutyag sa opisyal nga halos balik na karun sa normal ang biyahe sa mga bus nga padulong sa nagkadaiyang lugar sa Mindanao kini dungan sa mas gipaluagan nga mga restrictions o pagpailalom sa alert level 1.
Gani hinay-hinay na sab nga nakabawi karun ang DCOTT sa ilang kita nga labing naapektohan sukad nga nagsugod ang pandemiya kaniadtong 2020.
