DAVAO CITY – Laoman sumala pa nga dagsa ang mga pasahero nga mouli sa ilang tagsa-tagsa ka mga probinsiya karung adlawa sa Davao City Overland Transport Terminal (DCOTT) human nga gideklarang half day lamang ang trabaho sa mga buhatan sa gobyerno.
Apan luyo niini, andam sumala pa ang ahensiya nga i-akomodar ang bagang duot sa mga pasahero ug bastante ang mga unit sa mga bus aron masiguro nga makaabot ang mga nahisgutan sa ilang mga destinasyon.
Samtang gipasalig ni Aisa Yusoph, manager sa DCOTT nga nagpatuman sila karon ug hugtanon nga inspeksiyon sa mga bagahe nga dala sa mga pasahero ug gitambagan ang mga nahisgutan nga dili magdala ug mga butang nga gidili sulod sa terminal aron nga dili madilatar ang ilang biyahe.
Gipasalig sab ni Yusoph nga adunay 21 ka mga CCTV cameras nga gimuntar sulod sa terminal aron nga mamonitor ang sitwasyon sulod sa DCOTT.
Gipahibalo sab sa opisyal nga sa Biyernes Santo, bugtong ang Mindanao Star lamang ang mobiyahe paingon sa South samtang ang Bachelor ug Rural bus ang mobiyahe paingon sa Norte nga bahin.
