DAVAO CITY – Gilauman ang pagdagsang sa mga nasa syiento mil ka mga pasahero nga mupauli sa tagsa-tagsa ka mga probinsya karong Kwaresma.
Gikanayon ni DCOTT manager Dr. Aisa Usop nga madungagan pa ang mga bus nga mubyahe paingon ug paggawas sa Davao City atol sa pagsugod sa unang simana sa Abril, diin 1,500 ka mga byahe ang nakatakdang mupasada.
Giabisuhan na sab ang mga bus operators nga mukuha og special permit gikan sa LTFRB aron makaakomodar pa sa mga pasahero.
Gipatas-an sab ang mamahimong seguridad sa terminal pinaagi sa pagpakatag sa dugang mga security forces nga gilangkuban sa mga sakop sa PNP, Public Safety and Security Office, ug Task Force Davao.
Dili na sab nagsunod sa gihatag nga time interval ang mga bus kay kon ugaling mapuno na kini og mga pasahero, palargahon na dayon aron makasulod pa sa terminal ang lain pang mga manakayay.
Nagpahimagno sab ang terminal mahitungod sa “no pick up” policy diin bawal gihapon ang pagpasakay sa mga pasahero gawas sa terminal.
Sa pikas bahin, gipasalig ni Police Regional Office 11 spokesperson Police Major Eudisan Gultiano nga magpakatag ang pwersa sa kapulisan og nasa 2,000 ka mga personahe sa mga simbahan, terminal, ug uban pang mga lugar nga ginadagsang sa tawo gikan Abril 3 hangtud 9.
Pahimangno sab sa opisyal nga kon ugaling mugawas karong Holy Week, siguruhon nga nakandado ang bintana ug purtahan sa panimalay aron dili masudlan og mga dautang elemento.
via || Bombo LJF
