DAVAO CITY – Naka-doble alerto karon ang Davao City Overland Transport Terminal alang sa seguridad sa mga pasahero pinaagi sa pagpatuman og hugot nga security measures human sa natigayong pagbusikad sa usa ka bus Koronodal City sa rehiyon dose kagahapon, pasado alas 12:00sa udto, diin padayon kini ginasuta sa awtoridad.
Gibutyag ni Aisa Usop, manager sa DCOTT , nga gipakatag karon ang mga security guards, K9 handlers, kapulisan ug kasundaluhan nga nakadeploy sa pasilidad.
Samtang, magpatuman sab og hugot nga inspeksyon sa mga bagahe sa pasahero. Gimanduan usab ang mga bus companies nga likayan ang pag-pick-up og pasahero sa bisan asang dapir aron masiguro nga walay dautang elemento ang makasulod sa syudad.
Nanawagan usab ang ahensya ngadto sa mga pasahero nga mutuman sa palisya ug secutity measures nga gipatuman sa terminal.
Gipahimagnoan usab sa maong buhatan ngadto sa katawhan kalabot sa Culture of Security: Kapag may Nakita, Magsalita” kung diin mamahimo nga idangop sa otoridad ang mga butang ug mga tawo nga kadudahan aron mahatagan gilayon og aksyon ingon man mapakgang ang unsa mang dautang laraw sa dakbayan.
Gitambagan usab ang mga pasahero nga dili magbilin og bagahe nga makahatag og kakuyaw tung sanglit adunay balaud sa syudad nga mopahamtang ug penalidad niini.
