Gipasiugda sa Department of Budget and Management (DBM) ang plano nga maghimo og usa ka unified master plan aron mahatagan og dugayng solusyon ang kanunayng pagbaha sa nasud.
Ang tinguha, kabahin sa pangunang prayoridad sa administrasyon ni Presidente Ferdinand Marcos Jr., human masinati ang dako nga kalisdanan sa nasud tungod sa sunod-sunod nga kalamidad niadtong Hulyo nga miresulta sa pagka-displace sa milyong katawo.
Gipadayag ni Budget Secretary Amenah Pangandaman nga gikinahanglan ang panaghiusa sa mga ahensya sa gobyerno ug lokal nga panggamhanan labina sa Metro Manila alang sa pagplano ug pagpondo sa mga proyekto nga makasulbad sa baha.
Giila sa DBM nga dili parehas ang solusyon kada lugar, busa ilahang hangyo sa mga LGU ang pagsumite og menu o listahan sa posibleng mga solusyon nga angay sa ilang lugar.
Lakip sa mga gi-propose nga proyekto mao ang pagtukod og dam sa Marikina River, coastal protection sa palibot sa Laguna de Bay, modernisasyon sa mga pumping station, ug ang pagpalig-on sa early warning system ug koordinasyon sa tanang ahensya.
Apil sab sa plano ang pag-upgrade sa 36 ka daan nga pumping stations ug pagtukod sa dugang 20 ka bag-o nga estasyon aron masiguro nga maaprobahan ug masugdan dayon ang mga imprastraktura nga makalikay sa baha.
