DAVAO CITY- Hugot nga gikondena sa Davao de Oro Police Provincial Office ang pagpatay kang Police Master Sergeant Rey Binalangbang kansa gipusil sa wala pa gihapon mailang mga suspek alas 4:52 niadtong milabay nga adlaw samtang nagbyahe kini gikan Montevista, Davao de Oro ug paingon unta sa Monkayo sa nahisgutang probinsya samtang sakay sa iyang pribadong sakyanan.
Subay niini, hugot nga nagpahigayon ang Monkayo Municipal Police Station ug tanang Units sa Davao de Oro Police Provincial Office og hot pursuit operation ug lalom nga imbestigasyon alang sa posibleng pag-ila ug pagkasikop sa suspek sa nahisgutang mangilngig nga krimen. Kahinumduman nga naka-assign si Binalangbang sa Davao de Oro Police Provincial Office sa Provincial Supply and Accountable Office.
Gipasalig sa PNP nga muhimo og hinanaling aksyon aron gilayong maangkon ang hustisya sa gipatay nga sakop sa kapulisan. Nanawagan na lamang ang ahensya sa publiko nga kung adunay nasayrang impormasyon nga posibleng makatabang alang sa hinanaling pagsulbad sa kaso ug pagkasikop sa suspek, mamahimo kining i-coordinate ngadto kanila.
