Gimando sa Davao City Regional Trial Court ang pagpaaresto sa mga Seasonal Worker Program (SWP) for Korea Brokers nga sila Sheryl G. Ledesma alias Che Gomora/Che Guimora, Feb J. Granada alias Feb Dhel, Everam Gemetiza/Everon Gemetiza alias Jane March, ug si Sush Sevillano Tubal, human nga nalambigit kini sa large scale illegal recruitment dinhi sa dakbayan sa Davao.
Sumala pa, nga nagapangrecruit matud pa ang mga nahisgutan ngadto sa mga mag-uuma gamit ang Demeter Manpower Agency ug Demeter Manpower Corporation nga dili lisensyadong recruitment agency, diin nahimutang kini sa 317 Catalunan Grande, Sitio Ubat, ning syudad.
Giisyu matud pa ang maong warrant of arrest, sa dihang nagpasaka og reklamo ang mga biktima nga nakahatag og kwarta isip bayad niini ngadto sa mga mangingilad, gumikan sa pasalig ni Ledesma ug uban pa niining mga kakunsyabo sa maong overseas employment, nga mamahimo na kining makatrabaho isip mag-uuma sa South Korea, ilawom sa SWP Program sa usa ka LGU dinhi sa Davao Region.
Giawhag sa Department of Migrant Workers (DMW) ang uban pang mga nahimong biktima nga makig-koordina sa Migrant Workers Protection Bureau, aron nga makapasak kini og dugang kasong Illegal Recruitment.
