DAVAO CITY – Natala kagahapong adlawa, Setyembre 5, ang pinakataas nga single day rise sa COVID-19 cases sa tibuok Davao Region.
Subay sa datos sa Department of Health XI, 1,123 ka mga bag-ong kaso ang nadugang sa mga kaso sa COVID-19 sa rehiyon, ug anaa na sa 14,651 ang ihap sa mga aktibong kaso.
Sa nasangpit nag mga bag-ong kaso, 586 niini ang gikan sa Davao City, 43 sa Davao de Oro, 154 sa Davao del Norte, 140 sa Davao del Sur, 79 sa Davao Occidental, ug 121 sa Davao Oriental.
Anaa 104 usab ang recoveries nga natala kagahapon, diini 80 ang gikan sa Davao City ug 24 gikan Davao Oriental.
Mikabat sa 4 usab ang natalang namatay sa COVID-19, diin tigduha ang gikan sa Davao City ug Davao de Oro.
Ang tanang mga kaso nga natala kagahapong adlawa, pulos local cases.
Subay usab sa datos sa buhatan, 20.6% ang available ICU beds, 41.7% ang available Isolation beds, 25.9% ang available Ward beds, ug 66.3% ang available Mechanical ventilators.
Kamatikdan nga nagpahugot na usab og mga restrictions ang mga nagkadaiyang local government unit sa rehiyon, ug nagpahibalo na ang Southern Philippines Medical Center nga puno-puno na ang ilang ICU beds, tungod sa padayon nga makaalarmang pagsaka sa mga kaso sa COVID-19 dinhi sa Davao Region.
Gikabutyag usab sa DOH sa Kauluhan nga ang mas makatakod nga Delta variant na ang dominanteng strain sa SARS-CoV-2 virus sa Pilipinas, ug gilaumang magpadayon ang spike sa mga kaso sa nahisgutang kagaw.
