DAVAO CITY – Nangandam na karon ang Davao City Police Office (DCPO) sa pagpadayon sa anti-illegal drug operation human ang pipila ka mga orientation sa ilang mga personahe isip mga front lines.
Matud pa kang Sr. Insp. Maria Teresita Gaspan, tigpamaba sa Davao City Police Office, nga gikatakda na nga magpadayon ang illegal drug operations tali sa kapulisan ug mga sakop sa Philippine Drug Enforcement Agency (PDEA) XI.
Kabahin sa ilang orientation ang tukma nga pagpatuman sa search warrants sa mga indibidwal nga gikatahapang nalambigit sa ginadili nga droga.
Aduna sab sumala pay sunod-sunod nga mga refresher course alang sa mga personahe kalabot sa mga balaud ug tukma nga police operational procedures.
Samtang pakusgan pa karon sa kapulisan ang ilang programa ug operasyon partikular na ang Oplan Iron City ug Oplan Iron Fortress, ug uban pang anti-criminality ug anti- terrorism operations.
Gibutyag sab ni chief Supt. Manuel Gaerlan, director sa Police Regional Office (PRO) XI, nga gimandoan na niya ang kapulisan nga tumanon kung unsa man ang nakalatid sa balaud.
