DAVAO CITY – Hapit nang madeklara isip insurgency-free ang Davao Oriental kini tungod misamot kahuyang ang nahabiling weakened Guerilla Front 18 human nga napatay atol sa natigayong serye sa engkwentro tali militar ang lima ka mga miyembro niini niadtong Setyembre 11 ug 13 sa Lupon ug Banaybanay sa nahisgutang probinsya.
Kini mismo ang gikumpirma ni Capt. Mark Anthony Tito, tigpamaba sa 10th Infantry Agila Division, Philippine Army atol sa pakighinabi sa Bombo Radyo Davao. Kahinumduman nga insurgency-free na ang tanang probinsya sa Davao Region gawas lamang sa Davao Oriental gumikan sa presensya sa weakened Guerilla Front 18.
Apan dako ang pagtuo ni Capt. Tito nga wala na kini katakos gumikan subay sa ilang monitoring, wala na kaabot sa lima ka indibdiwal ang nahabiling miyembro niini nga padayong nagtago-tago ning kasamtangan.
Kahinumduman nga niadtong bulan sa Hulyo, mi-surender sa gobyerno ang front secretary sa maong guerilla nga si Narivel Verana alyas Liway ug pag-abot sab sa bulan sa Agosto, laing upat ka mga kaubanan niini ang mi-surender sab.
Sa pikas bahin, nagpasalamat ang kinatibuk-ang kasundalohan sa katawhan sa kanunay nga pagsuporta sa ilang kampanya batok insurhensiya. (VC 1 – TITO – REHIYON). Ang pahayag ni Capt. Mark Anthony Tito, tigpamaba sa 10th Infantry Agila Division, Philippine Army.
