DAVAO CITY – Nagpadayag og kadismaya si Davao Occidental Governor Claude Bautista gumikan kay nakasinati ang iyang lalawigan og kalit nga pagsaka sa COVID-19 cases.
Iya kining gibutyag atol sa gipatigayong Provincial IATF Special Action and Crisis Management Committee Meeting on COVID-19 sa Talyer, Brgy. Poblacion sa lungsod sa Malita. Misaka ang aktibong kaso sa lalawigan ngadto sa 329 human sa pipila ka bulan nga walay nagpositibo sa ilang dapit.
Sa mga natalang aktibong kaso, 197 ang gikan sa Sta. Maria, 56 sa Malita, 52 sa Jose Abad Santos, 21 sa Sarangani, ug 3 sa Don Marcelino. Nabalaka usab ang Gobernador tungod dunay 32 nga mga nakalas tungod sa makamatayng kagaw.
Hinuon, iyang gikalipay ang 947 recoveries gikan sa 1,308 total COVID-19 cases sa lalawigan sukad pa sa pagsugod sa pandemya kaniadtong Marso 2020.
Busa, nanawagan ang Gobernador ngadto sa PIATF nga buhaton ang ilang obligasyon nga protektahan ang mga lumulupyo sa Davao Occidental batok COVID-19.
Nakatakda na usab nga magpagula og bag-ong polisiya ang Davao Occidental Provincial Government ug ang lima ka lungsod niini aron sa epektibong pakigbatok sa nahisgutang matang sa sakit.
