Gipahigayon sa Island Garden City of Samal ang opisyal nga MOA signing ug kickoff ceremony sa Miss World Davao Region Franchise niadtong Miyerkules, Agosto 20, 2025 uban sa presensya sa media ug mga pageant supporters.
Ang maong kalihukan nagtimaan sa lig-on nga partnership tali sa Miss World Philippines Organization ug sa lokal nga franchise sa Davao.
Gisugdan ang programa pinaagi sa mensahe ni Arnold Vegafria, National Director sa Miss World Philippines, ug ni Lucky Santos, franchise holder sa Davao Region.
Si Santos mipahayag nga usa ka garbo nga maapil ang Davao sa Miss World Philippines 2025 nga ipahigayon sa bulan sa Nobyembre. Apan tungod sa kakulang sa panahon alang sa pagpangandam, ang representante sa Davao karong tuiga i-appoint na lamang sa franchise.
Si Vegafria nagsulti nga dako og tabang ang pag-abli og mga regional franchise sama sa Davao aron mapalapdan pa ang partisipasyon sa mga kababayen-an gikan sa lain-laing bahin sa Pilipinas.
Sa pagkakaron, anaa na sa kapin 30 ka lokal ug regional nga franchise ang nakapirma sa Miss World Philippines Organization, nga nagpakita nga nagpadayon kini nga plataporma nga mahimong tinubdan sa empowerment ug pasidungog sa kultura.
Pinaagi sa opisyal nga kickoff, gipakita sa Miss World Philippines Organization nga mas lig-on na ang presensya niini sa Mindanao. Ang tumong mao ang pagpangita sa mas daghang kababayen-an nga mahimong inspirasyon ug magdala sa mensahe sa “beauty with a purpose”.
