DAVAO CITY – Gikabutyag sa hepe sa Davao International Airport Police Station na si Police Major Mark Enargan, nga tungod sa simpleng pangomedya lamang nga dunay bomba sa sulod sa eroplano, nasangko sa pagkapriso ang babayeng pasahero nga taga-Pangasinan nga nagbuhi ug bomb joke kaniadtong Enero 29.
Sa kaso sa gikasuhan nga pasahero, gipamulong sa hepe nga dunay mga tawo nga wala masayod sa gibughaton sa simpleng bomb joke nga naghatod ug dagkong perwisyo sa ubang pasahero.
Gikanayon sab ni Enargan nga wala matud pa nagkuwang ang aiport police nga magpahimagno sa mga pasahero sa tugpahanan mahitungod sa mga dapat ug dili dapat buhaton sa airport.
Pipila sa ginapunting nga mga aktibidad sa airport police mao ang Bandillo/Rekorida nga usa ka daily activity nga maghatag ug mga kasayuran sa mga pasahero mahitungod sa Presidential Decree 1927 kon Bomb Joke / False Bomb Threat.
Nagpang-apud apud sab ang kapulisan og mga flyers aron mabasa sa mga pasahero ang mga detalye sa maong balaod. Nagpahigayon sab ug inadlaw-adlaw nga Pulong-pulong ang kapulisan sa mga pasahero diin aktwal nilang gihinabi ang mga pasahero aron maghatag og kasayuran alang sa ilang seguridad.
Gawas niana, madasigon sab nga nagpahigayon ang airport police og daily clean up drive alang sa limpyo nga palibot sa Davao Airport.
Lakip na ang pakiglambigit sa mga coastal clean-up drive matag bulan isip kabahin sa disaster response proactive measures sa kapulisan.
Gipaniguro sa DIAPS nga regular nilang ginapatuman ang safety measures sa tibuok tugpahanan.
via || Bombo LJF
