DAVAO CITY – Hugtanon na ang gihimong pagpangandam karon sa lalawigan sa Davao del Sur sa pagpanguna sa ilang gobernador nga si Marc Cagas, alang sa gikatakda nga pag-uli ni Tokyo 2020 silver medalist Nesthy Petecio.
Sumala pa kang Cagas nga nakigtigom na siya sa ilang mga department heads kung unsa ang gikinahanglan nga himuon aron lamang mahinayon ang aktibidad nga i-andam alang kang Nesthy. N
anghinaut na lamang karon ang opisyal nga unta dili mosaka ang kaso sa Covid-19 sa lalawigan aron nga malampuson nila kini nga mapahigayon.
Gitataw sab sa opisyal nga sa kasamtangan usa sa ilang gikonsidera mao ang pagpahigayon ug motorcade.
Himuon sumala pa nila ang Hero’s welcome sa munisipiyo sa Davao del Sur apan mag-agad pa gihapon sila sa mamahimong rekomendasyon sa Provincial Health Office (PHO) ilabi na nga mikabat na karon sa 6 ang natalang kaso sa Delta variant sa Davao region.
Subli sab nga gibutyag sa gobernador nga dakong garbo si Nesthy dili lamang sa ilang lalawigan kung dili sa tibuok nasod gumikan kay mihatag kini ug dungog ingon man nahimong kabahin sa kasaysayan sa mga Pinoy athletes nga nakakuha ug medalya atol sa pagsalmot sa olympiyada nga dugay nga gihandom sa nasod.
