Nipasaka na og kasong perjury si Davao del Norte Governor Edwin Jubahib ngadto sa kinse ka mga indibidwal sa Northern Davao Electric Cooperative (NORDECO) kagahapong adlawa.
Kini gumikan sa matud pa pagpamakak sa nahisgutang kompanya atol sa verification sa Ombudsman ug Office of the President nga wala kini laing kaso nga gi-file batok kaniya.
Matud pa sa opisyal nga wala siyay kasayuran sa data nga ginabasehan sa NORDECO hilabi pa nga nasayod gayud ang katawhan sa Davao del Norte, partikular na sa mga residente sa Island Garden City of Samal ug Tagum City nga aduna gayuy power shortage sa maong mga lugar kalakip na usab ang taas nga singil sa kuryente bisan paman sa dili maayong serbisyo.
Uban ang legal counsel niining si Atty. Israelito Terroen, nipasaka og kaso si Jubahib sa panghinaot nga mahatag ang barato ug maayong serbisyo sa supply sa kuryente sa probinsya.
Gibarugan sab sa opisyal nga gibuhat lamang niini ang sakto ug dili matud pa kinahanglan gamiton ang balaod aron silutan ang usa ka tawo nga wala matud pay kasal-anan.
