DAVAO CITY – Gikatakdang magsaulog sa ika-26 nga Founding Anniversary ang probinsya sa Davao de Oro karong Marso 8.
Apan inay nga saulugon kini pinaagi sa garbosomg selebrasyon, ipaagi ang pagsaulog niini sa pagtabang sa mga residente sa probinsya nga makabangon sa niaging mga katalagman.
Sumala sa provincial government, magpahigayon kini og mga libreng serbisyo sama sa jobs fair, one-stop shop, free legal services day, Tunol Serbisyo, ug uban pang kalihukan, nga ipahigayon gikan Marso 7-8, ning tuiga.
Gideklara sab nga special non-working day ang Marso 8 alang sa tibuok probinsya.
Sa pikas bahin, gipasalig sa Office of the Civil Defense 11 ang gianam-anam nga pagbangon sa mga residente sa Barangay Masara sa Maco.
Gikanayon ni OCD 11 regional director Ednar Dayanghirang, nagpadayon ang mga musunod nga lakang alang sa early recovery stage sa mga residente.
Gihisgutan na sab ang kalabot sa mamahimong itukod nga pabalay alang kanila, samtang gimuntar una ang usa ka tent city nga temporaryong puy-an sa mga nabiktima sa Masara landslide.
Samtang gikatakdang ibalhin ang tibuok komunidad sa mas luwas nga lugar apan hingpit nang i-kordon ang nadahiliang bahin sa Barangay Masara isip timailhan nga no-build-zone ang maong dapit.
Kahinumduman nga gihunong sa LGU ang search and retrieval operations kaniadtong Pebrero 22 diin natala ang anaa sa 93 ka mga patay human sa 16 ka adlaw nga operasyon nga nagsugod human sa nahitabong landslide niadtong Pebrero 6, ning tuiga.
