DAVAO CITY – Nagpahigayon og information drive ang Davao City Social Welfare and Development Office mahitungod sa mga kasayuran sa Republic Act No. 11596 kon Anti-Child Marriage Law uban sa gikatakdang pagpagawas sa Implementing Rules and Regulations kon IRR sa maong balaod.
Gikanayon ni Atty. Marlisa Gallo, CSWDO head, nga ilawom sa maong balaod, pagasilutan ang si kinsa mang naglambigit sa fixed ug arranged marriage, lakip mga naga-buhat og seremonya sa child marriage, ug mga hamtong nga nagpuyo uban ang ilang menor de edad nga kapikas.
Posibleng paga-atubangon sa mga nahisgutan ang pagkapriso sulod sa napulo ka tuig og pyansa nga musobra sa kwarenta mil pesos. Samtang kasuhan sab ang mga ginikanan kon guardian, ug mga officiator nga nagpaluyo niini nga pagasilutan sab og dose ka tuig nga pagkabilanggo ug multa nga musobra sa singkwenta mil pesos.
Kon ang usa ka opisyal sa gobyerno, nasuta nga nagpakasal sa usa ka menor de edad, gikatakdang masuspinde sa pwesto.
Dugang sab ni Gallo nga dili pa andam ang mga bata nga ipakasal busa posibleng madaot ang pisikal ug emosyonal nga estado niini. Makigtambayayong sab ang DSWD ngadto sa mga cultural groups nga nagapahigayon ug seremonya sa kasal aron mapasabot sa ilaha ang maong balaod.
Una nang naglusad ug symposium ang buhatan alang sa mga indigenous groups kaniadtong Nobyembre og gilaumang pagasugdan kini pagbalik karong bulana.
Kahinumdumang naaprubahan ni kanhi Pangulong Rodrigo Duterte ang maong balaod kaniadtong Disyembre 2021 apan gikatakdang ipagawas pa lamang ang IRR nga unang napinalisa ug giaprubahan sa DSWD niadyong Disyembre sa nakalabayng tuig.
via || Bombo LJF
