DAVAO CITY – Gipakusgan sa Davao Consumer Movement ang kampanya alang sa moderno, stable, ug episyente nga suplay sa kuryente sa Davao del Norte ug pipila ka bahin sa Davao De Oro pinaagi sa pag-pahigayon og mga miting uban sa mga stakeholders.
Nangampanya ang maong grupo alang sa Tagum City ug mga kasikbit nga dapit nga ibalhin gikan sa franchise area sa Northern Davao Electric Cooperative, Inc. kon NORDECO ngadto sa Davao Light and Power Company ang pag-distribute sa kuryente sa pipila ka bahin sa mga probinsya sa Davao del Norte ug Davao de Oro lakip na sa Tagum City ug Island Garden City of Samal.
Sumala pa kang Ryan Amper, co-convenor sa Davao Consumer Movement nga ang bayronon sa kuryente sa Nordeco adunay P5 nga diperesya kung itandi sa DLCP, diin, mas ubos matod pa ang rate sa DLPC nga P12 matag kilowatt hour kung itandi kini sa P17 sa NORDECO.
Kung kahinumduman, niadtong Hulyo sa milabayng tuig, gi-veto ni Presidente Ferdinand Marcos, Jr. ang House Bill 10554, o ang Act Expanding the Franchise Area of Davao Light and Power Co., diin magtangtang sa mga lungsod sa New Corella, Asuncion, Talaingod, Kapalong, ug San Isidro, mga siyudad sa Tagum ug Samal sa Davao del Norte, ug ang lungsod sa Maco sa Davao de Oro gikan sa franchise coverage area sa NORDECO.
Nanghinaot usab ang grupo nila Amper nga ma-refile og usab ang nahisgutang House Bill ug nanawagan sa mga leader sa Davao del Norte ug Davao de Oro nga dili gamiton ang politika isip rason aron matabangan ang ilang mga constituents nga nag-atubang sa kamahal sa kuryente.
Mapaso ang prangkisa sa NORDECO sa Davao del Norte ug Davao de Oro sa tuig 2028 gawas na lamang sa Samal nga ma-expire sa tuig 2033.
via || Bombo KMG
