Gikataho sa Davao City Vices Regulation Unit (VRU) ang pagkunhod sa mga milapas sa Liquor Ban ug Anti-Smoking Ordinances sa 2024 tandi sa tuig 2023.
Gikan sa Enero hangtod Disyembre 2024, nakatala ang VRU og 1,021 ka apprehensions alang sa liquor violations, nga miubos gikan sa 1,501 sa 2023.
Samtang, ang mga paglapas sa Anti-Smoking Ordinance mikunhod usab ngadto sa 6,045 ka apprehensions, gikan sa 6,822.
Sumala pa ni VRU head Hernando Q. Las, nga ang pagkunhod sa mga paglapas gumikan sa daghang pagpahibalo sa publiko, nga nagpakita og mas mubo nga mga paglapas sa duha ka ordinansa.
Ang kinatibok-an nga koleksyon sa multa alang sa duha ka ordinansa sa 2024 miabot og P9,965,900, nga ubos tandi sa P12 milyon nga nakolekta sa 2023.
Gipaklaro usab ni Las nga ang anti-smoking operations kasagaran ginahimo sa hapon, ug ang liquor ban enforcement nagamonitor gikan ala 1 sa kaadlawon hangtod alas 8 sa buntag.
Gumikan usab sa limitadong enforcers, nakigkoordinar na ang VRU sa Davao City Police Office (DCPO) alang sa dugang monitoring.
Sa 2024, tulo ka establisyemento ang temporaryo nga gisira gumikan sa mga paglapas sa ordinansa apan, mioperate na kini pag-usab human magsunod sa mga regulasyon.
Ang 20th City Council gipamatud-an nga ang Revised Comprehensive Anti-Smoking Ordinance ug amended Comprehensive Liquor Code sa 2024 epiktibo aron sumala pa protektahan ang mga menor de edad ug makontrola ang paggamit sa alkohol ug tabako.
