DAVAO CITY – Gipahugtan sa Davao City Veterinarian’s Office ang mas hugot nga mga lakang aron mabatukan ang African Swine Fever sa dakbayan human nakatala og kaso sa usa ka baboy nga nagpositibo sa maong kagaw human sa postmortem inspection sa Maa Slaughterhouse niadtong Hulyo 30 ning tuiga.
Gikanayon ni Dr. Maria Corazon Sepulveda , nga nasutang cleared ang maong baboy sa antemortem inspection niini apan naplagan sa postmortem inspection sa maong baboy nga natakdan kini ug ASF nga naggikan sa Banga, South Cotabato diin gikatala ang outbreak sa maong sakit.
Hinungdang, temporaryong gipahunong ang operasyon sa Maa Slaughterhouse gikan Hunyo 22 hangtud 26 alang sa disinfection ug limitado sab ang operasyon sa Malagos Slaughterhouse aron maprayoridad ang mga naggagikan sa Maa.
Tungod niana, gipamanduan ang kanunayng antemortem and postmortem inspections sa mga baboy ug gina-monitor sab ang mga merkado ilawom sa hugot nga surveillance. Temporaryo sab nga gipahunong ang stockyards sa Bangkerohan alang sa monitoring. Gipaniguro sab sa City Veterinarian’s Office ang hugot nga border inspection sa mga baboy nga nagasulod sa syudad. Walay dapat ikabalaka ang katawhan tungod sumala sa buhatan, walay outbreak sa ASF diri sa dakbayan.
by Bombo LJ FLorendo
