Nakab-ot sa Davao City ang P13,411,775,117.29 nga koleksyon nga kita sa miaging tuig.
Sumala pa ni Atty. Lawrence Bantiding, Officer-in-Charge sa City Treasurer’s Office (CTO), nga kini nagrepresentar sa 105.35 porsyento sa target nga koleksyon sa kita sa 2024 nga P12,731,143,382.
Ang koleksyon sa kita sa 2024 usab mas taas tandi sa koleksyon sa 2023 og 4.53 porsyento.
Nagpasalamaton ang CTO sa mga taxpayer sa ilang pagbayad og husto sa ilang mga obligasyon sa syudad.
Matud pa ni Bantiding, nga ang maong kontribusyon importante aron magpadayon ang syudad sa paghatag ug mas maayo nga serbisyo alang sa mga katawhan.
Gibutyag usab niini, nga ang target nga koleksyon sa kita sa 2025 mas taas pa kaysa sa target sa 2024 nga nagrepresentar og 12.69 porsyento nga mag-abot sa kapin sa P14 bilyon.
Ang pagtaas niini nagpakita sa pagtaas usab sa National Tax Allotment, ug sa gibanabana nga pagtaas sa koleksyon sa real property taxes ug business taxes.
Gisiguro sa opisyal ngadto sa publiko nga ang CTO magpadayon sa pagpatuman og mandato nga tukma ug patas aron makolekta ang angay nga buhis alang sa syudad ug maghatag og igo nga suoporta alang sa dabawenyo.
