DAVAO CITY- Ilusad sa lokal nga kagamhanan sa dakbayan, uban ang tabang sa Davao City Water District, ang Davao City Septage Management Program sunod tuig.
Tumong niini nga mahimong institutionalized ang water management system sa syudad. Tungod sa nagkataas nga coliform levels sa kasapaan sa syudad, gikanayong ang maong programa usa sa mga inisyatibo sa kagamhanan aron masulosyunan ang maong problema.
Magpatuman matud pa ang DCWD og septic dislodging ug collection services sa tanang residential areas ilalom sa Septage Management Program. Samtang ipailalom sab sa treatment facility ang tanang nakolekta nga mga hugaw ayha kini ibalik sa kasapaan.
Matud ni Jovana Cresta Duhaylungsod, spokesperson sa DCWD, ang maong programa makatabang aron sa ingon madumala pag-ayo sa mga residente ang ilang septic waste water ug mas mamahimong luwas ang pag-dispose niini. Lima ka mga treatment plant ang plano nga itukod sa syudad sa nagkadaiyang area nga sakop niini.
Niadtong milabay’ng tuig, bulan sa Mayo, kahinumduman nga mipalit ang DCWD og 3,300-square meter patch nga luna sa Malagamot Road, Indangan alang sa pinaka-unang Septage Treatment Plant sa syudad nga laumang mamahimong operational sa sunod tuig 2023.
VIA|| Bryan Chin Abe
