DAVAO CITY – Madasigon ang Davao City Police Office (DCPO) nga maduso ang ilang himuon nga transition diin gikan sa DCPO himuon na nila kining Davao City Police District (DCPD) sulod sa duruha ka tuig.
Himuon na matud pa nila kining police district aron nga mapalapdan ang ilang structure ug organization nga maoy dalan aron nga mas epektibo ug hapsay ang security measure ilabi na sa nagpadayon nga pagsala sa populasyon sa siyudad.
Matud pa kang DCPO director Police Senior Superintendent Alexander Tagum nakadawat na sila ug pagtugot gikan sa City Council ingon man sa Davao City Peace and Order Council sa ilang nahimong endorsement nga palapdan ang DCPO.
Tungod niini, gisugdan na nila ang pagkuha ug mga gikinahanglan nga dokumento nga ilang isumite sa national headquarters.
Sa kasamtangan wala pa sila nakadawat ug pormal nga pag-apruba sa Philippine National Police (PNP) Headquarters ug National Police Commission (Napolcom), bisan nga una ng gibutyag ni PNP chief Ronald dela Rosa andam kini nga aprubahan ang proposal.
