Opisyal nang gidawat sa Davao City Police Office (DCPO) ang bag-ong Acting City Director nga si PCol. Mannan Caracas Muarip, kini atol sa pormal nga seremonya sa pag-take over sa katungdanan nga gipahigayon sa DCPO Presidential Hall, Camp Captain Domingo E. Leonor, San Pedro Street, ning dakbayan sa Davao.
Ang maong seremonya gipangulohan ni P/Brig,Gen, Joseph R. Arguelles, ang Acting Regional Director sa Police Regional Office 11 (PRO-11), nga mibutyag sa iyang bug-os nga pagsalig sa liderato ug dedikasyon sa bag-ong opisyal sa pagpanalipod ug pagpatuman sa mandato sa DCPO.
Sa iyang mensahe sa pagdawat, gibati ni PCol. Muarip ang dako niining pagpasalamat sa higayon nga makaserbisyo sa katawhan sa dakbayan sa Davao.
Gipalig-on niini ang iyang panumpa sa pagpadayon ug pagpahugot sa katuyuan sa DCPO nga mao ang pagmintinar sa kalinaw ug kahapsay, pagpanalipod sa kahimtang sa seguridad sa publiko, ug pagpabakod sa pakigtambayayong sa komunidad.
Gipasabot usab niini ang kamahinungdanon sa panaghiusa ug aktibong kolaborasyon tali sa mga sakop sa kapulisan, lokal nga kagamhanan, mga stakeholders, ug sa tibuok komunidad aron makab-ot ang malungtarong kalinaw ug kalamboan.
Sumala pa sa bag-ong City Director nga sa pagsugod sa bag-ong liderato, nagalantaw kini sa usa ka pwersa sa kapulisan nga nagpakita sa tinuod nga kahulogan sa D.A.V.A.O.: nga adunay Dedikasyon ug disiplinado nga mga personahe nga adunay tumong ug responsibilidad, Actions nga nagpakita sa kaisog, integridad, ug dungog, Virtue nga sentro sa tanang desisyon, tungod kay balaan ang pagsalig sa publiko, A-list professionalism nga nagtakda og pamatasan sa pagpatuman sa balaod ug ang Organized efforts gikan sa tanang ranggo, nagkahiusa sa misyon ug serbisyo.
Si PCol. Mannan Muarip ang gipuli kang PCol. Hansel Marantan nga anaa na karon sa Camp Crame sa buhatan sa PNP Chief.
