DAVAO CITY – Magpatuman og shifting schedule sa klase ang tulonghaan sa Davao City National High School arun maakomodar ang gilauman nga 16,000 ka mga magtutungha sa taliabot nga pagbalik sa klase.
Nasayran nga adunay kakulangon sa mga magtutudlo sa maong tulonghaan sa umaabot nga in-person classes sa Nobyembre 2.
Giplano karon sa maong tulonghaan ang pagpatuman og double shift sessions tungod kulang sab ang classrooms ingon man ang mga magtutudlo.
Sumala ni Evelyn Magno, Principal sa DCNHS, ang unang shift sa klase magsugod alas 6:15 sa buntag hantod 12:30 sa udto.
Samtang ang hapon magsugod alas 12:30 sa udto hangtud alas 6:30 sa hapon.
Mamahimong maka-akomodar og 25 hangtud 30 lamang ka mga estudyante sanglit sundon gihapon ang health protocol nga social distancing.
Nasayran sab nga ayha pa ang pandemya, anaa sa 50 ngadto sa 60 ka mga magtutungha ang kayang ma-akomodar sa matag klase.
Matud pa ni Magno, misaad ang DepEd Davao nga tagaan sila og dugang 17 ka mga magtutudlo alang sa senior high school.
Ning kasamtangan, anaa pa sa kapin 5,000 ang nagpa-enroll ug lauman nga mutaas pa kini ayha ang pagsugod sa klase.
Via || JEN MANGUIOB
